Telearna twralı

«Qazaqstan» RTRK ŞQO fïlïalı, «Qazaqstan-Öskemen» telearnası Kendi Altay xalqınıñ tınıs-tirşiligi, älewmettik-ékonomïkalıq, qoğamdıq-sayasï damwı twrasında naqtı aqparat taratıp, memlekettik damw bağdarlamasınıñ sındarlı sayasatın qoldawda. Tabaldırıqtı tabandılıqpen attağan ärbir jaña qızmetker äkeletin tıñ ïdeyalardıñ arqasında arna éfïrindegi bağdarlamalardıñ sapası körkemdik stïli jağınan ilgerilew üstinde. Telearnada éfïrdi bezendirwdiñ grafïkalıq dïzaynı arttı. Aqparattıq xabarlar zamanawï texnologïyalar arqılı öñirdiñ kez-kelgen jerinen jetkiziledi. Taqırıptıq bağdarlamalar men xabarlardı äzirlewde avtorlıq közqaras pen özindik izdenis - bastı talap. Taqırıptıq xabarlar, avtorlıq bağdarlamalarda älewmettik-ékonomïkalıq, sayasï-qoğamdıq, mädenï jäne sporttıq sawıqtırw sekildi mäseleler jan-jaqtı qamtıladı. Xabarlar aqparattıq , tanımdıq, köñil-köterw, sawıqtırw t.b. bağıttardı qamtïdı.

Kendi Altaydıñ kïeli ordası - Öskemen qalasındağı stwdïya qazaq jerindegi tuñğış televïzïyalıq stwdïya retinde 1958 jılı nawrızdıñ 16-şı juldızında aşıldı. Sol küni telearnanıñ éfïrinde «Jeñis salyuti» bağdarlaması ötti. Qızmetke erekşe ınta qoyıp kirisken ujım birliginiñ arqasında 1959 jıldan bastap, aymaqta kïnoöndiris qurıla bastadı. Operatorlar «Kïev-S» degen qarapayım kameramen jumıs istedi. Ol kameralarda tüsirilim 15 metrlik plenkası bar kasetalarmen jürgiziletin. Eñ qızığı sol, 15 metrlik plenka tek 1 mïnwttıq tüsirilimge jetetin. Televïzïyalıq apparattardıñ jañartılwımen qatar, oblısta televïzïyalıq stansalar men taratw jelisi awmağın keñeytw maqsatında radïo jelisiniñ qurılısı jürip jattı.

1968 jılı 1 mamırda  Öskemen men awdandardıñ basım böligi Ortalıq telearnanıñ bağdarlamaların qabıldaw mümkindigine ïe boldı.

1974 jıldan respwblïkalıq bağdarlamalardı aymaq jurtı tamaşalap, odaq köleminde bolıp jatqan elewli oqïğalar ağımı twralı telearna éfïrinen xabardar bolıp otırdı.

1980 jılı Şığıs Qazaqstan oblıstıq televïzïyalıq stwdïya kïnooperatorları Mäskew olïmpïadasın tüsirwge qatıstı.

1981 jılı «Perspektïva» türli-tüsti televïzïyalıq apparattıq jäne jaña teleproekcïyalıq bloktar ornatılıp, paydalanwğa berildi. Körermenniñ közayımı bolğan arna éfïrinde türli-tüsti formattağı bağdarlamalar men jañalıqtar şığarılımı televïzïyalıq öndiristiñ tağı bir kezeñin artqa tastap, köş ilgerilewge bağıt aldı.

1988 jılı jıljımalı televïzïyalıq stancïya (PTS) ğïmaratı salındı jäne «Magnolïya 83-A» jıljımalı televïzïyalıq stancïyası paydalanwğa berildi. Ğasır talabına say jabdıqtalğan keşen arqılı är awdannan, öñirdiñ tarïxï-mädenï orındarınan éfïrge tikeley qosılwğa bolatın. 30 jıl işinde arna ujımı jıl sayın jaña şığarmaşılıq, texnïkalıq toptarmen tolığıp otırdı.

1997 jılı Semey men Şığıs Qazaqstan oblıstarınıñ birigwine oray, telearna men oblıstıq radïo ortaq oblısqa jumıs isteydi. Sol jıldıñ qazan ayında telearna 18 sağattıq awqımmen 12 metrlik qaşıqtıqta xabar taratwdı bastaydı.

 2003 jılı Öskemen oblıstıq teleradïokompanïyasınıñ atawı «Qazaqstan» RTRK AQ-nıñ Şığıs Qazaqstan oblıstıq fïlïalı dep özgertildi.

2008 jılı qaraşa ayınan bastap «Qazaqstan-Öskemen» telearnasınıñ 14 sağattıq xabar taratw tizbegi oblıstıñ 100 payızın qamtıdı.

2009 jılı televïzïyağa 4 kameralı jıljımalı PTS «Mersedes» köligi berildi.

2010 jılı "Qazaqstan-Öskemen" telearnası buğan deyin aymaqtar arasında bolmağan bastamanı qolğa alıp, aymaqtıq äriptesteri - «Qazaqstan-Semey», «Qazaqstan-Şımkent», «Qazaqstan-Qızılorda», «Qazaqstan-Atıraw», «Qazaqstan-Oral» t.b. telearnalarmen el üşin mañızdı, aymaq üşin mäni zor aqparattar awısımın qolğa aldı.

2010 jıldıñ jeltoqsan ayınan bastap, aymaqtıq arnalar işinde alğaş ret "Qazaqstan-Öskemen" telearnasınıñ "Aqpar" aqparattıq şığarılımınıñ beyne nusqasın www.cityinfo.kz aqparattıq portalınan körw mümkindigi twdı. Bul ŞQO boyınşa soñğı jañalıqtar men oqïğalar jaylı ärbir qazaqstandıqtıñ elimizdiñ kez-kelgen nüktesinen tanıswına jol aştı. İzin swıtpay, "Aqpar" aqparattıq şığarılımı tağı 3 saytqa: www.Altaynews.kz, www.1vko.kz, www.vkonurotan.kz ornalastırıldı.

2011 jılı telearnada éfïr bezendirwdiñ grafïkalıq dïzaynı arttı, 3D jüyesine köşti.

«Qazaqstan» RTRK ŞQO fïlïalı, «Qazaqstan-Öskemen» telearnası QR Prezïdenti qatıswımen ötken ulttıq, respwblïkalıq jäne oblısaralıq mañızdağı köptegen teleköpirler men aymaqta uyımdastırılğan qoğamdıq-mañızdı is-şaralardıñ tikeley körsetilimderin joğarı deñgeyde uyımdastırıp, éfïrge berw barısında käsibï biliktiligimen tanıldı.

«Qazaqstan» RTRK ŞQO fïlïalı, «Qazaqstan-Öskemen» telearnası tek oblıs awmağımen şektelip qoymay, memleketaralıq şekaralıq baylanıstardı nığaytwğa da belsendi atsalıswda. Onıñ ayğağı – Ulı Jeñistiñ 69 jıldığına oray, QR Şığıs Qazaqstan oblısınıñ ortalığı – Öskemen qalası men RF Altay ölkesiniñ ortalığı - Barnawl qalası arasında ekijaqtı teleköpir uyımdastırdı. Onıñ izin swıtpay, käsipkerlik baylanıstar taqırıbında Öskemen (ŞQO, Qazaqstan) – Barnawl (Altay ölkesi, Resey) – Mogïlev (Mogïlev oblısı, Belorwssïya) arasında üşjaqtı teleköpir ötkizdi.

«Qazaqstan-Öskemen» telearnası köptegen belsendi bastamalardıñ da uyıtqısı boldı. Telearnada bastaw alğan el awmağında balaması joq sonı joba – baspasöz maslïxatın tikeley éfïrde körsetw mümkindigi bar «Qazaqstan-Öskemen» baspasöz-klwbı jumıs istewde.

«Şığıs Qazaqstan oblıstıq telearnasında «Qazaqstan-Semey», «Qazaqstan-Şımkent», «Qazaqstan-Qızılorda», «Qazaqstan-Pavlodar» jäne «Qazaqstan-atıraw» t.b. telearnalarmen el üşin mañızdı, aymaq üşin mäni zor aqparattar awısımı uyımdastırılğan. Täwelsiz eldiñ tuğırın asqaqtatwda atqarılıp jatqan jumıstar jemisi ayqın. 

«Qazaqstan-Öskemen» telearnasınıñ tikeley éfïrdegi «Jañalıqtar-Novostï» aqparattıq bağdarlaması Öskemen, Semey t.b. qalalardıñ ortalıq köşelerinde kündelikti LÈD-dïspley ékrandarında körsetiledi. Sonday-aq, «Jañalıqtar-Novostï» aqparattıq şığarılımı kündelikti 5 ïnternet-saytqa: www.Cityinfo.kz, www.Altaynews.kz sayttarına ornalastıraladı.